Maike Paul, Panbult
‘n Naweek vol pret, lag en leer waar ons baie onvergeetlike herinneringe geskep het!
Vanjaar se tienerkamp het van 12 tot 15 Desember by Fels naby Paulpietersburg plaasgevind. Dit was eenvoudig fantasties saam met ons tienerouers Dieter en Ronelie Prigge.
Hierdie naweek het ons die gelykenisse van Jesus bestudeer en soveel geleer dat ons nou selfs ons eie gelykenisse kan uitdink!
Benewens die leersame oomblikke, was daar ook baie aksie: Ons het vlugbal en sokker gespeel en met groot vreugde gesing – ‘n groot dankie aan Angelika Johannes, wat die sang so spesiaal gemaak het.
Die weer was meestal warm, maar Saterdag het dit koud geword, sodat ons ongelukkig nie op ‘n uitstappie kon gaan nie. Maar ‘n rondte “Weerwolf” het ons lank vermaak!
Sondag het ons die naweek afgesluit met ‘n wonderlike diens in die kapel, waar die koperblasers aan die begin gespeel het, ons as tieners ons geoefende liedjies gesing het, die fluite aan die einde gespeel het en ons saam God geprys het. Dit was heerlik om ‘n “gemeente” rondom ons te hê – ‘n groot dankie aan almal wat die kapel kom vul het!
Ons dank die Here dat alles so goed verloop het, asook die pastors Andreas Albers en Martin K. Paul vir hulle waardevolle kennis – ons waardeer julle moeite baie.
‘n Spesiale dankie gaan ook aan tannie Sarina Hayward vir die heerlike kos wat ons elke dag geniet het.
En natuurlik wil ons baie dankie sê aan oom Dieter en tannie Ronelie wat vir vier dae ons ouers was. Sonder julle sou die naweek ‘n groot deurmekaar gewees het! Dankie oom Dieter dat jy ons elke oggend wakker maak met die vrolike klanke van die tromboon, en tannie Ronelie vir jou humor en lewensvreugde.
Dankie ook aan Angelika vir jou positiwiteit terwyl ons musiek gemaak het en aan Maria vir jou ondersteuning tydens die speletjie Saterdag.
En laaste maar nie die minste nie: Dankie aan al die tieners wat vanjaar deelgeneem het – sonder julle sou die kamp nie half-pad so lekker gewees het nie!
