Die kinderkamp het van die 12de tot die 15de Desember 2019 te Lüneburg plaasgevind. Daar was 86 kinders, 20 helpers en 6 klein kindertjies, wat nie deelgeneem het nie.
Onder die tema “God praat ons taal” is die Bybellesse oor twee dae verdeel. Die eerste dag het gehandel oor die geskiedenis van die Toring van Babel, die mense wat teen God se wil opgetree het en toe, as vloek, die verwarring van die tale ontvang het.
Die tweede dag het gehandel oor Pinkster, toe God hierdie vloek in ’n seën verander het en almal die wonderlike boodskap in sy eie taal kon verstaan.
Ons wil Pastor Thomas Beneke bedank vir die voorbereidings oor hierdie onderwerp, wat tot seën vir oud en jonk geword het.
Daar was baie om die dae mee te vul. Ons het gesing, gefluit, kersfeeskoekies gebak, ’n vasvra afgelê en sport gedoen. Daar was ’n uitstappie na Werner en Marica Hillermann se plaasdam, waarheen ons met ’n vragmotor gery is. Ons bedank Werner en Marica hartlik vir die bereidwilligheid en moeite om hierdie uitstappie moontlik te maak. Dit was lekker!
’n Skattejag het aanleiding gegee tot baie interessante foto’s. Almal het Saterdagaand saam na hierdie foto’s gekyk en natuurlik het elkeen hulself op elke foto gesoek.
Die Graad 6’e moes, soos altyd, meisies teen seuns in ’n Survivorspeletjie wedywer. Dit was baie, baie opwindend, veral toe albei spanne net voor die einde vyf punte elk gehad het. Laastens moes hulle ’n vuur aansteek. Dit was toe die seuns, wat as wenners uit die stryd getree het en die meisies as wenners van die beste gees.
Die Lüneburg gemeente was ’n wonderlike gasheer. Die kos was heerlik! Baie dankie daarvoor!
Die hoogtepunt van die kamp was die erediens Sondagoggend. Die kinders het aan die begin en einde van die diens gesing en die fluitgroep het “Ihr Kinderlein kommet” met ’n wonderlike solo gespeel.
Baie dankie aan alle helpers. Om die week saam met die kinders te beleef was ’n seën vir almal. Dit was regtig lekker!
Ons dank ons hemelse Vader dat ons hierdie geleentheid gehad het en ons geseënd weer huis toe kon ry. Ons sien uit na die volgende keer!
Heike Böhmer, Arcadia
