Op Sondag 15 Maart 2020 het die hervestigde Roeleveld-orrel vir die eerste keer in ‘n amper propvol kerk in Panbult, tot lof van God, weerklink.
Die indrukwekkende Allegro moderato maestoso deur Mendelssohn-Bartholdy het vanuit die galery weergalm en die ryk toonkleure van die nuwe instrument het die vertrek gevul.
Die Roeleveld-orrel, wat in 1992 in ‘n gereformeerde kerk in Springs ingebou is, is deur Pastor Matthias Albers ingewy. Die gemeente het met vreugde in die gesange ingestem en sodoende ook met die godsdienstelike musiek die Woord van God verkondig. Na die preek is die gesang Herr Christ, der einig Gotts Sohn (Here Christus, die enigste Seun van God) van Bach meesterlik versier. Die koor het die reddende boodskap In keinem andern ist das Heil (Die Saligheid is in niemand anders nie) aan die gaste en gemeentelede gebring, tesame met die loflied Preiset mit mir, preiset den Herrn (Prys met my die Heer) van Händel. Daar was genoeg rede vir prys op daardie dag: ‘n ideale orrel vir die vertrek, wat tot die inwyding heeltemal gefinansier en deur ‘n meester van sy vak ingebou en geïntoneer is; orreliste wat die orrel met kundige hande (en voete) kan bespeel; en ‘n gemeente wat elke Sondae in lofsang deur die orrel gelei word.
Die orrelbouer verantwoordelik vir die hervestiging, Mnr. Jan Elsenaar, was ook teenwoordig met sy vrou, Jackie, en sy seun en kollega, Marinus saam met sy verloofde, Eldanesta. Aan die einde van die diens het Elsenaar sy eie improvisasie van verskeie bekende melodieë gespeel. Hy het die disposisie van die orrel met sy 856 pype wat oor 14 registers versprei is, voorgestel. Opvallend is hoeveel moontlikhede deur ‘n orrel met behulp van die verskillende registers moontlik gemaak word: ‘n Wye repertoire van hemelse musiek wat op alle Sondae van die kerkjaar gehoor kan word.
Die Panbult gemeente kyk nederig op ‘n suksesvolle projek terug wat nie moontlik sou gewees het sonder die onbaatsugtige toewyding van baie mense en die genade van ons hemelse Vader nie. Baie dankie aan almal wat betrokke was! Ons sien met dankbaarheid uit na die toekoms en kyk afwagtend na die Sondag (na COVID-19), wanneer ons weer saam met die orrel in die kerk tot eer van ons Here kan musiek maak.
Angelika Johannes, Panbult
